Америк дахь монголчуудын амьдралд өрнөсөн бүхий л төрлийн арга хэмжээ болох баяр наадам, хурал чуулган, спортын уралдаан тэмцээн, уралдаануудаас мэдээ сурвалжлага маань бүтдэг. Эдгээр нь Монголчуудын өдөр тутмын амьдрал, баяр баясал, урам зоригийг харуулдаг тул хамгийн их үзэгчтэй хөтөлбөр юм.

Энэ нэвтрүүлгээрээ төсөөллийн Америк биш хөшигний ард монголчуудын амьдрал хэрхэн буцалж байгааг, цаг наргүй, халуун хүйтэн нөхцөлд ажиллахын хажуугаар сургуульд сурч ирээдуйн амьдралаа хэрхэн босгож байгааг бодит байдлаар, нэмэлт хачиргүйгээр хүргэхийг зорино. Энэхүү нэвтрүүлэг нь Америкийг зорих гэж буй хэн бүхэнд үнэн бодит ойлголтыг хүргэх зорилготой.

Америкт дөнгөж хөл тавьсан болон ирээд удаагүй байгаа монголчуудад хэрэгцээтэй, энгийн, өдөр тутмын амьдралд хэрэгтэй мэдээллийг хүргэхээс гадна, монголчуудын дунд явагдаж буй арга хэмжээ, амьдралын хэв маяг, тэдний жаргал зовлон, бэрхшээл, залуучууд хэрхэн амжилттай ажиллаж байгааг бодитоор харуулдаг. Мөн АНУ-д амьдарч буй монголчуудаас гадна, Монголоос Америк руу зорих гэж буй хүмүүст зориулан орчны соёл, байгалийн үзэсгэлэнт газрууд, хууль, эрх зүй, бизнесийн орчин зэрэг олон талын мэдээллийг товч, тодорхой хүргэнэ. Нэвтрүүлэг нь хууль, эрх зүй, даатгал, бизнесийн орчин, эрүүл мэнд, санхүү, спорт, чөлөөт цаг, консулын цаг зэрэг олон булантай ба, америк дахь монголчууд өөрсдөө хөтлөн явуулж буйгаараа онцлогтой.

Алсад суугаа аав, ээж, амраг садан, анд нөхөд, үр хүүхдүүддээ уянгат дуу, уран бүжиг, утга төгөлдөр найргийн гүн санааг зүрхнийхээ үг болгон илгээдэг нэвтрүүлэг юм. Энэхүү нэвтрүүлэгт урлаг, соёл, спортын алдартнуудаас эхлээд 10 жилийн сурагчид хүртэл оролцож, өөрсдийн сэтгэлийн үгийг ая дуугаар илэрхийлдэг.

UMON TV нь гадаадад амьдарч буй авьяас билэгт уран бүтээлчид болон Америк дахь Монгол дуу, бүжиг, хөгжмийн дугуйлангуудтай хамтран олон видео клип бүтээж, архивын сангаа улам бүр баяжуулсаар байна.

Алс хол ажиллаж, амьдарч байгаа ч эх орныхоо хөгжилд хувь нэмрээ оруулах хүсэл хүн бүрт байдаг.Тиймээс Америкт ажиллаж буй эрдэмтэн, судлаач, санхүүчид нэгдэж, дэлхийн эдийн засаг, шинжлэх ухаан зэрэг олон сэдвээр монголчуудад хэрэгтэй мэдээлэл хүргэх зорилготой “Brain Talk–DC Podcast”-аа эхлүүлсэн юм.Подкастын онцлог нь зочин хөтлөгчид маань өөрсдийн санал бодлоо ил тод, илэн далангүй хуваалцаж, бодит туршлага, суралцсан зүйлсээ нээлттэй ярилцдагт оршдог юм.

Монголчууд хэдийгээр харийн оронд амьдарч байгаа хэдий ч үндэс угсаа язгуур гарал  нэг болохоор яах аргагүй  "Манайхан " . Аливаа хүн манай юм, миний юм гэсэн бүхийл зүйлдээ өөрийн гэсэн чин сэтгэлээр ханддаг болохоор " Манайхан " өөрсдийн зүйлдээ хайр гамтай, халуун сэтгэлтэй, өршөөл нигүүлсэлтэй байж, оюун билэгтэй авъяас чадвартай нэгнийгээ дэмжсэн, уруу доройхон нэгнийгээ ухааруулсан нэгэн гэр бүл мэт эвтэй найртай байж гэмээнэ амжилтанд хүрч аз жаргалын галыг мөнхөд бадамлуулах бус уу. Тиймээс " МАНАЙХАН" теле сэтгүүл гадаад амьдарч байгаа монголчуудынхаа бэрхшээл зовлон, бахархал амжилтыг олон түмэнтэйгээ хуваалцаж тэднийг сурталчлан таниулахад оршино.

COVID-19 цар тахлын улмаас боловсролын салбарт үүссэн хүндрэл, бэрхшээлийг хүүхэд, залуусын хөгжилд ашиглах боломж болгон харсан тул “Америкт суръя” нэвтрүүлгийг эхлүүлсэн юм. Энэхүү нэвтрүүлэгт Америкийн их, дээд сургуульд хэрхэн суралцах, элсэх зэрэг практик мэдээллийг хүүхэд, залуус болон эцэг эхэд хүргэдэг.

Америк дахь урлаг соёл, бизнес, спортын төлөөлөл болсон Монголчуудын амьдрал ахуй, уран бүтээл, хөдөлмөр зүтгэлийг үзэгчдэд хүргэж, тэдний амжилтын замналаас гадна аливаа саад бэрхшээлийг хэрхэн даван туулсан тухай үнэн бодит түүхийг хүргэдэг. ​Энэхүү нэвтрүүлэг нь зөвхөн хувь хүний түүхээр хязгаарлагдахгүй, харин Америк дахь Монголчуудын бодит амьдрал, үнэт туршлага, бусдад үлгэр дууриал болсон дурсамжит түүхийг харуулдаг цуврал юм.​​​